Nunga sidung be mangan siang nakkin di mal Ambassador. Mangan di "lapo Pakatuan" do hami nakkin rampak dohot si Valen. Biasana nian tolu halak do hami, alai alana lagi martugas dongan na sada na i tu luar kota, ima Balikpapan, ba gabe holan hami padua ma jo sahali on.

Attar siak do nakkin lompan nai, tarlumobi apala Woku nai do nakkin hupesan. Nunga dipaboa partiga-tiga nai nian na siak hian do molo  woku on, alai sinuba majo ninna rohangku. Huhut ma hujalo sabotol teh botol sosro laho minum na asa adong mangimbangi woku i annon molo dung siakan pamanganon.

Tikki na mangan i, tarbereng au do barita di tipi na di mal i taringot tu kecelakaan kereta api manang biasa digoari KRL manang Kereta Api Listrik. Ala hurang tangkas do soara ni tipi i begeon alani rame ni na mangan di mal i, gabe husuba ma mamereng berita na di internet ima detikcom, sian hape nokia lima ribu ualu ratus ekspres musik hi. Toho do tutu, nunga tung mansai rame barita i di detikcom. Na naneng so ma nian kareta depok ekspress mandapothon manggarai, hape tompu dilanggar kareta ekonomi bogor sian pudi. Pola do adong na luka borat alai datung adong pola na sampe monding.

Adong muse ma lewat namarbaju, pintor hatop do digorahon si Valen.

"Bro, baju biru, mantap" 

Molo tu namarbaju i nian apalagi molo adong "sina sina" na, pintor hatop do dapot radar ni baion :). Alai memang lumayan do itoan i.

Dung sidung mangan, songon na biasa ba antar songon na pinahusor-husor ma jo butuha on asa masuk indahan na baru pinangan i. Sambil ma manghata-hata i akka na masa tarlumobi di parkarejoan di kantor. Topet muse adong dongan kantor na mar-base di Balikpapanbaru haruar manang biasa didok risain. Jadi lagi mangalalului panggantina do nuaeng si bos. Adong do issu na berkembang boha molo pegawe na di Jakarta ma di papinda bahen pangganti ni na haruar sian kantor na di Balikpapan i. Alai molo sarupa do gaji na dohot na di Jakarta, ba dia ma adong na olo i. Alai molo di panaek do gaji nanggo apala nasa tunjangan na ualu juta i, ba olo do au ninna si Valen, huhut mekkel.

Songon na biasa, dung sidung mangan, molo ari jumat songon on, jolo manuhor ubat do hami paima mulak tu kantor. Alai asing do ubat na di son on. Jagung na dicampur mentega dogot susu dohot keju do maksut na. Dang huboto sian dia dalanna umbahen na gabe ubat goar ni i. Parjolo jolo ndang pola olo au dohot dohot manuhor ubat nai, alai dung hea sahali husuba, ba tung tabo do tahe, dung i gabe sai dohot ma au molo naeng manuhor ubat halak i padua.

Dung i, mulak ma hami padua tu kantor natape nian boi dope mardalan-dalan paima pukkul sada. Dung sahat di kantor, hupagalak ma komputer hu naung kinussi hian nakkin paima turun tu toru. Molo pukkul songon on, manang tikki maradi mangan arian, boi do antong marinternet sampe pukkul satonga dua. Hubukka ma pesbuk ala on do na antar na masa di tonga-tonga ni masyarakat sonari on. Dang holan naposo, dakdanak ro di namatua pe dohot do na marpesbuk pesbuk on :). Tung mansai hebat do memang pesbuk on boi mangalalap-lalap i iba ala tung mansai godang do akka parmeaman na boi bahenon di pesbuk on. Adong do sada parmeaman ima premier putbal. Di premier putbal on, boi ma iba mambangun sada kulub sepakbola angan-angan. Binahen ma angka dongan na di pesbuk i gabe pemain na, iba gabe pelatik na attong. Songoni ma tong angka dongan na asing di pesbuk marsipambahen kulub na be jala boi do pajugu-jugu on angka kulub i. Sai hira sitoho-toho ma tahe.

Dung sai marpesbuk, hubukkan ma websait hu ima item ex pe dua dot com. Nunga leleng dang adong isi nabaru di web i, gabe tarpikkir ma naeng manurathon saotik manang aha petaho. Ba husurat hon ma apala na masa tikki mangan nakkiningan :)