Namardongan do si Darianus dohot si Jamordong. Sakarejo do nasida di pete jala rappak sapodoman do nasida nadua. Sai hira naung leleng do nasida naung marsitandaan molo berengon ni halak, hape satohona, habilangan bulan dope nasida nadua na mardongan i. Parjumpaan nasida nadua ima ditikki di jalo nasida karejo di sada pete ni halak jepang i di Mukakuning. Ala na sian hitaan nasida jala rap marjalang sahalakna be do nasida, ido gabe songon na sarupa parnasipon nasida si tano Batam on. Parjolo sahali, tohodo nasida disi molo didok ikkon marhemat nasida andorang so dapot gajian dope, ima gaji naparjolo i. Jadi satahi do nasida asa tinggal nasida disada kamar kontrakan di Batuaji. Rupani, attar sossok do anggo sipat nang pangalaho nasida nadua, rappak koji marende, koji marbola kaki, nang koji manonton sepak bola di tipi.
Di pete pe nunga godang umbotosa akka dongan nasida na sa kontrakan do nasida nadua jala jotjot do kontrakan nasida i gabe jabu parpungu-punguan ni naposo. Mardomu, naburju mardongan do nasida.
Disada tikki, dung dijabu nasida nadua rap manonton semi pinal ni Liga Champion Eropa ima tikki Barselona maralo tu Chelsea, dibereng si Jamordong ma si Darianus songon na hohom jala murhung bohi i. Tottu sahali, songon naso tabo do molo iba mekkel marsonang-sonang hape dongan merlungun ni roha, ninna si Jamordong dibagas rohana. Lobi muse, diboto ibana do, ia si Darianus on, sahalak na koji do mamereng Chelsea, ai sai dipasuman-suman ibana do pangalaho ni si Dorogba tarlumobi molo marbola nasida, hape holan birong na i do na dos. Sude do asing, tarlumobi parnasiponna.
“Aha namasa boh.,..songon na mendung do hubereng di jembatan Barelang an..” ninna si Jamordong songon na marlalum. “Boha lae, sakosong ma dilae?? Barselona di au..” ninna muse. Ai diboto ibana do tong sahit ni si Darianus on, molo nunga tu namartaru-taru, uang kontrakan pe boi do linop, asalma Chelsea ditiop ibana.
“Dang ro ringgas namanonton on” ninna si Darianus.
“Boasa gale lae, na so boi do maranak horbo jattan i di huta??” ninna muse marlalun.
“Biasa ma lae,…”
“Manang na di tolak do sitta ni lae??” ninna songon na mandatui, manukkun.
“Sai hira datu pangolpuk do ho, dibotoi hodo dohot nadikolor hon” ninna si Darianus, songon na hona sukkun-sukkun ni si Jamordong i.
“Ai tolu do lae na masa tu halak hita molo lungun rohana, molo dang adong pasisigaret, kode buntutna attar hona otik, ia so i, alani anak boru” ninna si Jamordong songon na malo.
“Olo bah…mantap itoan i, sadepartemen nami, na baru masuk dope itoan i, dua bulan dope, alai songon na malengleng ate-atekki molo huida” ninna si Darianus.
“Kessil ma i lae…perlu hubaen sian nadidompet hon??”
“Tutu do on lae, nga madabu holong au bah”
Nasida nadua nangpe sa pete, alai marasing do anggo inganan parkarejoanna, ima departemenna, jala dang masipaida-idaan nasida nadua molo tung pe rap karejon nasida. Molo sian rupa nian, tu ukkuran ni halak hita boi ma dohonon baoa na gatteng do nasida nadua. Jala di tikki baru masuk dope si Duma, huroa tor marpangoit ma tu rohani si Darianus. Andorang so marsitandaan nasida, nunga diboto si Darianus na boru Batak, ai sian goar i pe tanda do. Lam leleng, lam balga ma holong i. Jala dipataridahon si Darianus do i, olo do diarahon si Duma on rappak mangan di kantin. Jala sai disukkun do rupani aha barita tiap manogotna i. Dang lupa, molo nga di jabu sai si esemes do, hape nian pajupa do tiap ari. Ai didok ibana do molo dang diida ninna nanggo sadetik, sai hira naung sundut do portibi on.
Asing si Darianus, asing do si Duma, ai poso dope ibana baru pe tammat sian sikkola, jala naeng karir ma parjolo luluanna, huhut muse, borua pamillit do ibana. Anggo songon sitelan ni si Darianus do ninna, olat ni ‘maintenance’ di pabrik boi dua pulu dapot au, ninna dibagas rohana. Jadi molo di istilahon saonari, jual mahal do ibana. Mardomu ma tu natua-tuana pe sahalak pamilliti do, ai boi dohonon anggo apala halak hita di Batam on sude do na mananda i, ai ise naso mananda anggota de pe er de nuaeng on ateh, na jot-jot tarida di jolma natorop.
Nunga piga doli-doli muttul martandang tu jabu ni itoan on, ala pangalaho ni natua-tuanai, tarlumobi amongna. Sai pittor didulo do tu luar rupani, mamakke aha do nasida na ro on. Anggo apala naik Ge El do manang goyang lutut alias mardalan pat, bah...horas ma. Tor hatop do disuru si Duma laho modom, alai molo mar mobil do, attar disuru dope pangurupi i mambaen kopi.
Disukkun si Darianus do, boha pangalaho ni itoan na tinggal di sada perumahan na massai uli di hutai ima apala na jonok tu Mall Panbill i. Jala sude do namananda ibana mandok, dang kalasna itoan i, anggo dang ihur martimus lae dang dapotmu i, ninna sahalak donganna. Jadi tung marsak ma ibana.
“Beta ma lae, tu dormi hita, asa dibereng ho jo au martandang” ninna si Jamordong.
“Beta ma tutu, mardomu malam minggu on, sai dijabu hita” ninna si Darianus.
“Alai dah, au ma gumodang an makkatai, pokokna holan patandahon au ma ho, jala manang aha hudok sitau olohon ma” ninna si Jamordong muse.
Dang sadia leleng sahat ma nasida nadua tu jabu ni si Duma, jala songon na mardongan nasida denggan do diakkupi si Jamordong, jala dipatandahon si Darianus ma ibana tu itoan i.
“Mahua jari-jari munai ito…” ninna si Duma, dibereng ibana songon na dilapiti si Jamordong tolu jari-jari sihambirang i, jala sangajo do diangkat ibana tibbo laho manginum tes manis i asa disukkun itoan i ibana.
"Dapot!!" Ninna ibana dirohana.
“Imadah ito…” ninna nanget. “Adong sigaretmu lae??? Habis bah…” ninna tu si Darianus, hape holan kode do on asa lao do si Darianus on, ai nunga i nakkinon hata nasida.
Tinggal ma si Jamordong dohot si duma.
“Mabugang tangan hi nakkinon, ribak dibaen kassa” ninna huhut dipareso jari-jarinai.
“Adong huting Siberia di jabutta, nian nunga binaen sada bilut inanganna, jala binaen do ase dua asa ngali,…” ninna si jamordong, huhut diinum muse tes on.
“Ai huting begu aha i ito” ninna si Duma songon na hona dirohana, ala lomo do tong roha ni ibana mangida huting.
“Lao natua-tua i liburan na bulan na lewat tu Petersburg, ima na di Rusia, jadi diboan sada anak ni huting on sian an, hape dung sahat dison dang ha urus nasida, dilehon ma tu au, ala diboto boi au mangurus, hape asing do inganan ni on, ai ikkon ngali do, jadi nga hubaen nuaeng inganan ni huting on na khusus tu ibana, jala tolu ma ase pangalihon, jala siallangonna pe ikkon na sian Rusia i do tinuhor, habis ma biaya tuson, ikkon sian kredit kart do…..”
Huhut ma songon na unduhunduk itoan i, dungi disukkun muse “ Aha hubunganna tu jari-jarimunai”
Anggo natua-tuani si Duma, dibege-bege do nasida na makktai i apala sian labasan ni jabu i, huhut manonton tipi. Huroa songon na tabo do dibege ibana suhutan ni si Jamordong tariongot tu huting siberia on, ro ma tupikkiranna, na paradongon do si Jamordong.
“Imadah, nantoari, lupa au manutup pittu i, hape tor haluar huting on, di labasan nami i adong do disi sada akuarium nabolon jala diingani sada ihan Arwana, supper red ninna goarnion, au pe ito sopola huboto massam ni ikkan on, alai na liburan hami nantoari tu penang Malaisya bah huboan sada. Manibbung huting on tu gijang ni aguarium on, alani biarhu masuk tubagas hulele hatop, hape di tibbung muse tu gijjang ni tipi LCD nabolon si 56 insi i, humalaput ma au manakkup, hape dang huparrohahon tartuttuk ma kassa na marbingkai hau jati nasian jepara i, ido asa mabugang tangan hon" ninna ibana muse. Huhut ma di uduti nasida na makkatai i.
Mullop ma amanDuma, sian pudi ala songon na hona do gaya ni si Jamordong namakkatai i, jala marsijalangan huhut marsitandaan ma nasida. "Parpete-pete do au tulang" ninna ibana.
"Olo ma bere, alai nuga menejer ra hamu ateh bere.."
"Ah tulang on nian....siloja- loja do iba"
"Ai didok hamu, lae i, natua-tuamuna tu Rusia, apala aha do karejona??"
"Songoni ma tulang, ala opat hami gelleng ni damang on, jadi tung na susa do ibana mangalului karejo i, na adong do tolu perusahaanna di bidang parmasi dohot alat kesehatan, jadi adong undangan sian rusia lao seminar, huhut liburan"
"Jadi dokter do natua-tua i??"
"Daong tulang, abanghu siakkangan do dokter, jala akkang boru ipe dokter do, di Jakarta do nuaeng, dokter spesialis na rittik"
"Molo halak ito, natoras boru??"
"holan dijabu do tulang, alai adong tolu ruko di jolo ni jabuttai, martiga tiga imitasi dohot parhiasan na asing muse, asa adong daon lalapna" ninna si Jamordong muse. Lam tamba ma longang ni amanDuma mamereng haserepon rohani ibana.
"Ai tuson naik aha hamu bere??"
"Imadah tulang, dohot dongan nakkinon mar kareta, ai mardomu dison do nuaeng anggikku siappudani, liburan, ala ipe ibana tammat sian akabri, jadi dilean suti piga ari, gabe diboan do mobilhu liburan, mamereng-mereng pulo Batam on ninna".
"Ai opat ninna hamu bere martinodohon, nadeba nai??"
"Imadah tulang, massai lomos do natua-tua on mamereng sipaiduaon, bohama pilot ni maskapai ni perancis i do ibana, jadi sahali satonga taon do ibana mulak, hape nunga dilean natua-tua i di ibana sada perusahaan i, alai dang olo ibana."
"Ai na nunut do huroa natua-tua i akke..."
"Ido sai dipaddok tu hami tulang, opat hami anakkon na jala ninna nasida ikkon sonang ma tinggalhononna hami molo dung sundut arina, jadi sai didokdo asa marsiajar iba di perusahaan on, ido alana gabe ro iba mangaratto tu batam on, na marsiajar do" ninna si Jamordong.
Mantap ma nasida namarnonang i, ai gabe amanDuma nama dongnanna marpollung, jala hatop ma disuru si Duma mambaen akka siallangon na metmet dohot si inumon na las, isara bir dohot na asing. Ninna rohani amanDuma, dang sala be borukkon mamillit na gabe donganna. Ipe sahalion adong na jeges ro martandang.
* * *
Dung dipardalanan lao mulak nasida nadua sian partandangan i, disukkun si Darianus ma bohado sarana asa boi tudduk natua-tuani itoan i, alai jolo di jalo ibana ma sipatu napinakke ni si Jamordong i, ai bohama sipatu pijjaman do i.
"Dia sipattukki lae, marsolop do ho nakkinon, gabe ho unggatteng, hape iba do na martandang"
"ho nian lae..."
Di ingot nasida dope, na tinonahon ni amanDuma si Jamordong asa ro muse, jala asa rap manonton liga inggris nasida di jabu. Ai ninna amanDuma do tu si Jamordong "sarupa do hita hape bere, rap lomo do rohatta mamereng liga inggris on"
"olo tulang, na di bulan na salpu pe au mulak sian london, manonton derbi Mencester i, ai molo siaran langsung hape iba mamereng nasida, sarupa do hape dohot na dihitaan an.." ninna si Jamordong muse mandok. "alai tulang, naeng mardalani jo hami marsogot dohot pariban on nian" ninna si Jamordong.
"Boi ma i bere, unang pola dia-dia roham...sukkun ma paribanmi" huhut dibereng si Duma na serom-serom otik.
"Bagak jala uli do tutu itoan on bah" ninna si Jamordong dibagas rohana, ai sai lao do pamerengna tu itoan i. sip.
Dung diluar kompleks i, dijou nasida ma tukang ojek manaruhon nasida nadua tu kontrakan
Binuat sian blogni latteung , diedit saporluna